It's fearsome baith to see and hear her when she wampishes about her arms, and gets to her English, and speaks as if she were a prent book, let a-be an auld fisher's wife.

But, indeed, she had a grand education, and was muckle taen out afore she married an unco bit beneath hersell.

She's aulder than me by half a score years--but I mind weel eneugh they made as muckle wark about her making a half-merk marriage wi' Simon Mucklebackit, this Saunders's father, as if she had been ane o' the gentry.

But she got into favour again, and then she lost it again, as I hae heard her son say, when he was a muckle chield; and then they got muckle siller, and left the Countess's land, and settled here.
But things never throve wi' them.

Howsomever, she's a weel-educate woman, and an she win to her English, as I hae heard her do at an orra time, she may come to fickle us a'.".