It wasna for luve o' Paperie--na, na!--nane could ever say that o' the trades o' Glasgow--Sae they sune came to an agreement to take a' the idolatrous statues of sants (sorrow be on them) out o' their neuks--and sae the bits o' stane idols were broken in pieces by Scripture warrant, and flung into the Molendinar burn, and the auld kirk stood as crouse as a cat when the flaes are kaimed aff her, and a' body was alike pleased.

And I hae heard wise folk say, that if the same had been done in ilka kirk in Scotland, the Reform wad just hae been as pure as it is e'en now, and we wad hae mair Christian-like kirks; for I hae been sae lang in England, that naething will drived out o' my head, that the dog-kennel at Osbaldistone Hall is better than mony a house o' God in Scotland." Thus saying, Andrew led the way into the place of worship..