An' says I, 'My lord,' says I, 'ye oucht to ken better! I s' say nae mair i' the noo, for I'm ower angry.
Gang yer ways--but na! no thegither, my lord! I s' luik weel to that!--Gang up til yer ain room, Eppy!' I said, 'an' gien I dinna see ye there whan I come in, it's awa' to your grannie I gang this varra nicht!' "Eppy she gaed; an' my lord he stude there, wi' a face 'at glowert white throuw the gloamin'.

I turned upon him like a wild beast, an' says I, 'I winna speir what ye 're up til, my lord, but ye ken weel eneuch what it luiks like! an' I wud never hae expeckit it o' ye!' He began an' he stammert, an' he beggit me to believe there was naething 'atween them, an' he wudna harm the lassie to save his life, an' a' the lave o' 't, 'at I couldna i' my hert but pity them baith--twa sic bairns, doobtless drawn thegither wi' nae thoucht o' ill, ilk ane by the bonny face o' the ither, as is but nait'ral, though it canna be allooed! He beseekit me sae sair 'at I foolishly promised no to tell his faither gien he on his side wud promise no to hae mair to du wi' Eppy.

An' that he did.

Noo I never had reason to doobt my yoong lord's word, but in a case o' this kin' it's aye better no to lippen.

Ony gait, the thing canna be left this wise, for gien ill cam o' 't, whaur wud we a' be! I didna promise no to tell onybody; I'm free to tell yersel,' maister Grant; an' ye maun contrive what's to be dune." "I will speak to him," said Donal, "and see what humour he is in.