He needna hae latten them awa' ohn tellt (without telling) them that he was their brither.' 'They had behaved verra ill till him.' 'He used to clype (tell tales) upo' them, though.' 'Laddie, tak ye care what ye say aboot Joseph, for he was a teep o' Christ.' 'Hoo was that, gran'mither ?' 'They sellt him to the Ishmeleets for siller, as Judas did him.' 'Did he beir the sins o' them 'at sellt him ?' 'Ye may say, in a mainner, 'at he did; for he was sair afflickit afore he wan up to be the King's richt han'; an' syne he keepit a hantle o' ill aff o' 's brithren.' 'Sae, gran'mither, ither fowk nor Christ micht suffer for the sins o' their neebors ?' 'Ay, laddie, mony a ane has to do that.

But no to mak atonement, ye ken.
Naething but the sufferin' o' the spotless cud du that.

The Lord wadna be saitisfeet wi' less nor that.

It maun be the innocent to suffer for the guilty.' 'I unnerstan' that,' said Robert, who had heard it so often that he had not yet thought of trying to understand it.

'But gin we gang to the gude place, we'll be a' innocent, willna we, grannie ?' 'Ay, that we will--washed spotless, and pure, and clean, and dressed i' the weddin' garment, and set doon at the table wi' him and wi' his Father.