What for no ?' 'You 'at's been in a' day wi' a sair heid! I'll jist gang benn the hoose and tell the mistress, and syne we'll see what she'll please to say till 't.' 'Ye'll do naething o' the kin', Betty.

Are ye gaein' to turn clash-pyet (tell-tale) at your age ?' 'What ken ye aboot my age?
There's never a man-body i' the toon kens aught aboot my age.' 'It's ower muckle for onybody to min' upo' (remember), is 't, Betty ?' 'Dinna be ill-tongued, Robert, or I'll jist gang benn the hoose to the mistress.' 'Betty, wha began wi' bein' ill-tongued?
Gin ye tell my grandmither that I gaed oot the nicht, I'll gang to the schuilmaister o' Muckledrum, and get a sicht o' the kirstenin' buik; an' gin yer name binna there, I'll tell ilkabody I meet 'at oor Betty was never kirstened; and that'll be a sair affront, Betty.' 'Hoot! was there ever sic a laddie!' said Betty, attempting to laugh it off.

'Be sure ye be back afore tay-time, 'cause yer grannie 'ill be speirin' efter ye, and ye wadna hae me lee aboot ye ?' 'I wad hae naebody lee about me.

Ye jist needna lat on 'at ye hear her.

Ye can be deif eneuch when ye like, Betty.